حرصا من المدونة على تتبع كافة الأخبار حسب أهميتها، قام المسؤلون عن المدونة ( أنا يعني ) وبإشراف ومتابعه من سعادة الرئيس العام ( اللي هو أنا برضوا ) بإستخدام كافة الوسائل المتاحة والغير متاحه وتسخير كافة الإمكانات ووسائل الإتصال للقاء الجني صاحب قضية القاضي المسحور لمعرفة كافة الحيثيات وهو بالمناسبه لقاء غير مسبوق على مستوى العالم بل ونؤكد في مدونة كتابات أنه أول لقاء لجني مع وسيلة إعلاميه رسميه أو غير رسميه وإليكم اللقاء كما هو مع الأخذ بالإعتبار أنه تم حذف بعض المصطلحات والألفاظ بسبب إن الجني طلع داشر وراعي سفر وسربته.
كتابات : اولا نرحب بك ونشكرك على هذه الفرصة واللقاء الذي خصصت به مدونة كتابات وحياك الله
الجني : هلابكم ومافي مشكلة على الرغم إني زعلان من التحقيق اللي نشرتوه لأن فيه بعض المعلومات المغلوطه، ولا عاد تعيدونها
سلامات عسى ما شر ، حنا نشرناه كما ورد من المصدر
الجني : ماعلينا
ماهي صحة الإدعاءات عليكم وهل تم إطلاق سراحكم أم خروجكم بكفاله أم أنكم حطيت رجلك والباب
لالالا أنا خرجت بتعهد بالحضور وقت الطلب ومنع من السفر وبناءا عليه تم سحب كافة المكانس من البلد حتى نهاية التحقيق وفعلا تم سحب مكنستي
أما الإدعاءات فهي باطله طبعا والسقيفة ما تطيح إلا على راس الجني والمواطنين طبعا ، ولا مال لأهلي والأراضي والصكوك ولو فينا رغبه في العمائر والعقار ، كان طحنا وإمتحنا محمد بن راشد وخذينا برج خليفه وجزيرة النخيل
يعني إنتم مالكم أي علاقه ؟ طيب ليش ورد إسمكم وبعدين وش سالفة الوسيط؟
أكيد مالي علاقه وإنتم ما تعرفون الضرر اللي لحقني ، لأن الموضوع وصل مباحث الجان وأنا مطلوب عندهم الآن للتحقيق، ومديرهم طالب مني أشاركه ولا بيسجني ، أما الوسيط اللي يقولون عليه بصراحة سهرت معه كم مره في عزايم عامه وعنده إستراحه وتخبر بعض الأمور نقص عليهم مره ( رد ليبل ) ورحت جبت لهم عفوا كود رد لا يروح بالكم بعيد وعليها ما شفته إلا قليل.
أما إني تعاون معاه ونسحر الشيخ ولا أتلبسه ، سلامتكم .
طيب سؤال عام بعيد عن القضية هذي ليش إنتم يالجان مرتبطين بالفساد دائما والآن فيه قضايا كثير تحت البحث بسببكم
الجني مقاطعا : كيف يعني تحت البحث ، مثل إيش
تخبر البنجال اللي سوا معهم الغيدان لقاء ببرنامج تسعة وتسعين ، البنجال هلحين يقولون إنهم كانوا مسحورين وجني كان متلبسهم وجابو شيخ ( واستنطق الجني ) والجني إعترف حتى الإندونيسيه مشتكيه لحقوق الإنسان إن لابسها جني
وفيه قضايا كثير منها سهم بيشه ومشروع جزر البندقيه وعلاوة إصدار الحكير
الجني : أول شي أنا شفت البرنامج حق الغيدان وحلوه والله الحلقه وعجبوني العيال السعوديين اللي يقلدونهم في اليوتيوب ، بعدين سالفة إن البنجال قالو جني لابسهم ، إيه من حقهم إنتم فتحتوا علينا باب للي يسوا واللي ما يسوا والمشاريع والأسهم الناس جتها فرصه وماحد ردهم وقالوا لفرعون وش فرعنك قال لقيت شركاء
إيه لكن فيه إفادات قويه موثقه من بعض الراقين تتضمن إستنطاقكم وسيتم تقديمها للمحاكمه ، وعندنا مثل يقول ( رجل الديك تجر الديك ) وسالفتك في المدينه اللي مسويها فتحت قضايا كثير في مجالات كثيره بل ووصلت للرياضه، الآن به قضيه مرفوعه لدى الإتحاد الدولي لمباراة السعودية وألمانيا ، 8 / 0 ، كذلك خروج الشباب والهلال من الآسيويه ، غير حالات الطلاق والفضائيات وبعض مشاريع الدولة بل إن أحد البنوك السعوديه الأوربيه يقولون إنك إنت السبب في تعيين مدير المشتريات الأسيوي وإعطاءه الصلاحيات أيضا بالمدفوعات، وإن الآسيويين حاطين رجلهم في هالبنك
الجني : شف يبو سعد ، أنا عارف وش قصدك وتران عارف الطبخه عندكم في البلع والمشاريع وتبين أعطيك زود عطيتك ، أنا عارف هالفساد كله وهذا مالنا علاقه فيه، والكوره هذا آخرة تخطيطكم والله إني زعلان حالي حالكم إنتم مجتمع بصراحه ومن غير زعل ..... ، والبلع عنكم صاير في دمكم ولازم تشوفوا لكم حل، هلحين ماسكين لكم واحد سرق عنز مدري نعيمي ونتفتوه سجن سنتين ولا مدري كم وهذول اللي سارقين دخان برضوا سجن وهامورة المدينه طعش سنه وجلد ، والل بالعين مليارات إقامه جبريه ؟ طيب وحقين سوق المال واللي بلعو حق الناس يعني مالقوا إلا الجارالله يعني ؟ طيب والباقين ، طيب وفلوس الغرامات هذي بترجع للناس اللي تضررت؟ ياخي شف عاد وقلت لك الراقي هذا والقاضي فتحوا علينا وعليكم باب ، إنتي تدري هلحين كل تحقيقات جده قل عليها السلام؟
شف إنت طلبت لقاء وقلت لك أبشر، تبينا نسولف برضو أبشر تبي تقعد تقول لي إتهامات بحق الجن وكن ربعكم ملايكه أبي أحط رجلي
لالا تفضل وخذ راحتك
إنت تدري هلحين إن عندنا راقين من الجن يرقون الجن اللي متلبسين فيهم إنس وتحديدا سعوديين ولا عرب ، والراقين اللي عندنا مسوينها بزنس، وحالات عندنا إنتم متلبسين فينا وجالسين تعلمون الجن
ابو سعد بقول لك شي ، إنتم عليكم شغلات الجن يارجل ما تفكر فيها ، مثلا سالفة القاضي المسحور ، بلاش ذا ، الأسبوع الماضي يقولون إنهم ماسكين وفي المدينه برضوا تزوير في شهادات ميلاد أجانب وإنكم مطلعين لهم عيالهم بأسماء وجنسيات سعوديه ، سالفة جده : قابلني إذا بتسوون شي، البنوك حالبه هالبلد وما عندك أحد، هلحين تتكلمون عن الشكشه والطرب وهالبنيات طيب إنتم ما سألتم نفسكم هالمحطات من وين جابو قروش؟
بعدين شف هالصدف بالله ما قد مسكوا ربعكم رشوة إلا خمسين ألف ونت نازل ، طيب ليش مابه رشاوي إلا كذا وين رشاوي الملايين ؟ ولا ذيك عمولات ؟
طيب القمار ممنوع بالسعوديه صح؟ طيب ومسابقات الرسايل ( sms ) وأرسل كلمة حلم ولا دجاج واربح سياره ذي ماهي شركات سعودية ؟ طيب إفتحوا قمار ويانصيب رسمي وضمنوا قروش الناس.
أنا من غير زعل شايفك تخبص ومنت مخللي أحد
الجني مقاطعا : ليش إنتم مخلين أحد في حاله؟
تصدق عاد أكثر شي أعجبني المسلسلات الداجه اللي مترجمينها للإنجليزي ، يعني تهقا إن الخواجات تاركين كل هالمحطات ومقطعين نفسهم ينتظرون هالمسلسلات على قناتكم الثانيه ؟ طيب ذا وش تسميه ؟
إنتي تدري هاك اليوم بتلفزيونكم به برنامج بالطبخ ويوم الشيف يشتغل طفت الأنبوبه؟ هاه قولوا عاد الجني طفاها
ولا سالفة الإسعافات الكوريه اللي تمشي وتطفي وحالتها حاله، إنت لو شفتها والله ماعاد تدور ورا الجن
قلت لك جالس تخبص ذي في ذي ، خلنا في موضوع المحاكمه ، وش تعتقد آخرتها
الجني : سلامتك بيخلوني أوقع على كيفهم والجماعه يطلعون منها وهاه إن قدروا قدروا على هالوسيط إن ماعنده واسطه
وبالنسبة لي ، ماني عارف وين بروح
يعني بتسافر وتحل عنا
الجني : أجل ويش أجلس أسوي، هلحين يقولون إنتبهوا للعيال ورقوهم من الجن ، وبزارينكم هم جن بحالهم ولازم حنا نرقي أنفسنا منهم الواحد فيهم غثيث ووسخ ونا أول مره أشوف بزر الواحد يسأله إيش إسمك حبيبي يوم الولد يتفل بوجه الرجال، وعيالكم الكبار ، دشير ما غير السربته ، بين الشوارع والإستراحات والواحد إن تيس في الدراسه وسهر وقلة حياء جات أمه تدور له شيخ تقول إن وليدها ضعيف ومسحور
ولا حرمه ماغير من بيت لبيت وكلها كراث وشعرها الله يعلم عن ريحته والبيت على الخدامه وإن مشت ماغير تدابك تقال خرتيت، وزوجها هاج عنها وعايفها وعايف أهلها وهي ما غير تطارد وتدور شيخ تقول إن رجلها مسحور وجايته عين ومايجي للبيت
بالله خلصنا لنا هالحوار وفكني ،،نص البلد بالعينها وهلحين عقب سالفة المدينه النص الثاني بيبلعونه وفهمها عاد.
أشكر لكم وقتكم
أعزائي زوار المدونه ، إن صدقنا الراقي مصيبه ون صدقنا الجني مصيبه وقد حذفنا العديد من النقاط وجزء كبير من اللقاء لأن الجني ما خلا أحد بحاله وصل حتى لعمرو موسى وبان جي مون
ولعلك تسأل عزيزي القارئ هل تم هذا اللقاء فعلا مع الجني ؟ وأقول لك لم لا تصدق ؟ ألم نطلب إفادة الجني في المحكمه؟
للقضاء في المملكه كل القدر ولفضيلة القضاة ومجلسهم الموقر كل العرفان ونحسبهم بإذنه الله محافظون مؤدون لأماناتهم وحين ترتكب الأخطاء من البعض ندرك أنها تصرف شخصي لا يمس القضاء بأي حال من الأحوال إلا أن من حقنا على إخواننا في القضاء التعامل مع قضية المدينه بكل شفافيه وعدل
ليست هناك تعليقات:
إرسال تعليق