حصريا لكم أحبتي أقدم لكم إفادة الجني بعد التحقيق الذي تم معه كما حصلت عليه من صحيفة حابس حابس الجنيه من خلال موقعها على إنترنت الجان التي تصل سرعتها إلى 200 تيرابايت وأترككم مع الإفاده والتحقيق كما ورد من المصدر
المحقق : إسمك؟
الجني: ومالك ومال إسمي إنت تبي تزوجني إنت ووجهك؟
المحقق: لا حووووووووول من أولها؟ إحترم نفسك ورد على الأسئلة
الجني : أنا لي ثلاث أيام في التوقيف وحاطين في الغرفه خمسين واحد معاي ولا تدخين والأكل زي وجهكم إمتحنتونا بفول وشكشوكة البنجالي راعي البوفيه
المحقق: إيش رايك طيب ناخذك الكونتينتال ولا برج العرب، إسمع عاد والله إن ما روقت وحترمت نفسك غير تكره نفسك وأقرفك في حياتك وتلعن اليوم اللي شفتنا فيه
الجني: يارجال روق والله ما عندك ماعند جدتي إلا هات دخان على الأقل
المحقق : طيب بجيب لك دخان وشوف آخرتها
الجني : روثمان ولا أبو بس تكفى ( كرافين إيه )
المحقق : بنشوف آخرتها ، جاويد جب له اللي يبي
المحقق: إسمك
الجني : س. م. م. ( تعتذر المدونة عن التصريح بالإسم لأن الجني لا يزال متهما )
المحقق : ويش تشتغل
الجني : وزير خارجيه، يعني إيش رايك أنا أعمل جني
المحقق : ويش علاقتك بالقاضي المتهم
الجني : مابه علاقة قابلته مرتين او ثلاث شفته عند ( الوسيط ) مره وكنا سهرانين على مباراة البارشا وعقبها قابلته في بتزا هت
المحقق : يعني مالك علاقة عمل معه
الجني : سلامتك إنت شايف وجهي وجه علاقة مع قاضي ، ياعمي دشيركم يالله الفكه منهم وتبين أروح لقاضي؟ يعني إنت تبلعها بالله؟
المحقق: الرجال يتهمك إنك إنت اللي كنت تؤثر عليه في المعاملات والصكوك الخاصة بالوسيط
الجني: شف يا إبن الناس : تقولي إقامات ، تقولي معاملات تجديد أقولك إيه لكن صكوك وأراضي وملايين أنا مالي فيها وتبي حسابي في البنك أعطيك إياه ، يعن لو هالملايين عندي أكيد بتلاقيني في بيروت ولا كان يعني مالقيت إلا عندكم في السعوديه؟ بعدين تعال نحسبها بالعقل ، هلحين كل ما واحد قام يسرق ويلعب ماعندكم غير الجن تتهمونا ياخي والله عيب عليكم
المحقق: سالفة البنك ذي ما تهمني حنا شيكنا على حساباتك والكريدت كارد وكلها مضروبه
الجني: شفت كيف مضروبه كل ما قدمت قرض مسكوني الباب وقالو لي عندك سجل في سمه تصدق إنها فاتورة شركة الإتصالات ، على تلفون أرضي موقفه من سنتين وما أستخدمته والفواتير مستديمه ، وعندي نسيبي جني في مكتب الإتصالات ووعدني بإنه بيتلبس في الدويش ويشيلها عني وقلت له أجل تكفى السعوديين ضعوف خله يشيلها عن كل المواطنين تكفا خلنا نسوي خير طالما إن شركة الإتصالات راكبه راسها.
المحقق: ماعلينا إلا بالمناسبه كيف زين معاك أشوف معاك شريحتين وحده زين ووحده موبايلي
الجني: خلها على الله ، زين مشتغلين أهلي ما عرفت لمذهبهم مرة رسايل إشتراكات العفاسي الإسلاميه ومره حليمه بولند ومن مده وأنا اطارد في البراك والجني اللي عندهم منكدين عليه زين من يوم شروا الرخصة ب 22 مليار ومتوهقين فيها وموبايلي غثوني بالهلال ونت عارف إني إتحادي والكول سنتر إنت عارفه إلا ورا ما تقولهم يبطلوا صرف إعلاانات وفلسفه ويصلحون الكول سنتر
المحقق: أشوفك خبير إتصالات ما شاء الله وصكوك وبنوك ورياضة
الجني : والله كلها في كوم وسالفة هالقاضي بكوم ، تخبر تهمه من قاضي أخرتها معروفه محكوم محكوم يعني يصدقوني ولا يصدقوا القاضي؟
المحقق: طيب إنت إيش اللي خلاك تتلبس في القاضي وتحوس الدنيا وشوف الوسيط ما نفعك
الجني: ياعمي قاضي مين إنت ليش ما تقول مثلا إن القاضي متلبس فيني ، شف عاد حنا الجن لنا أساليبنا لكن والله سالفة القاضي هذي ما تخطر في بال أي جني وهلحين لعنبوا إبليسكم كل ما واحد بلع له بلعه قلت فيه جني وتجيبونا وتبهذلونا تحقيق وتعذيب ، ماصارت
المحقق: يعني مالك أي علاقه بصكوك الأراضي؟
الجني: ياعمي قلت سالفة الصكوك والأراضي هذي مصيبه مالنا فيها، هذا بزنس يبو الشباب طيب إنت ما تسأل نفسك أنا وش مستفيد؟ أقولك أدور قرض ونت تقولي صك ، ياخي شف حساباتهم وراجعوها ونت عارف أننا ما ندور سيارات نروحي ونجي على مكانس ومن طلعت المكانس الكهربائيه تعبنا ومقطوعين يعني وفلوسكم هذي ما نستخدمها والقرض أنا مقدمه لواحد منكم فزعه يبي يعرس ومع ذلك لقيت نفسي بالقائمه السوداء. والكريدت كارد والكاش نخليه معنا تمويه فقط وترا الجن ما يستخدمون النقد حنا نتبادل السلع والخدمات ولو تبي قروش جبت لك بأي عمله تبي ذهب تبي ترقيه ، تدلل بس
المحقق: كيف يعني ؟ : كيف يعني أطلب أي طلب؟
الجني : إيه
المحقق: بس تكفى بيني وبينك إنت عارف العمل والمصالح ماودي أخرب على نفسي
الجني : أبشر وعهد بيني وبينك والله أني ادور منفعتكم وما خربها غير القاضي
المحقق: يعني عندي شوية طلبات بسيطه
الجني : تفضل
المحقق: يعني عندي زوجتي في المدينة ،وجا تعيينها في هجرة تابعه لمنطقة عفيف ، أقول يعني لو تشوف لنا جني يجيب لنا راس واحد من مسؤلي وزارة التربيه
الجني: إلا وزارة التربيه وتعيين المعلمات والله ألف جني ما يحلها لكم إلا أقترحت يسوون نصب تذكاري لوفيات وحوادث المعلمات يعني ميموريز مثل الميموريز حق 11 سبتمبر وقالوا إن ذا مخالف شرعا ، ويوم توسطت عند جني مقيم في الوزاره ورتب الأمور رتبها غلط ، ضبط لكم تعيينات بنات المسؤلين وكنت انا طلبت منه إنه يشوف حل لعامة الناس وبنات المسؤلين يعينونهم في الهجر والقرى ، لكن خوي الجني اللي في الوزارة كان مسطول هاك الليله ويوم كلمته علشان تعيين المعلمات في المدارس الأهليه ويشوفون حل لسالفة مرتباتهم وقلت لهم إن مرتب ألف ولا ألف وميتين عيب بحق مواطنه سعوديه ، لكن لا تزعل والله إنكم يالسعوديين بالذات تسوون شغلات حنا الجان ما نسويها ولا تخيل بالله به أي جني يرضى إن مرتب معلمه سعوديه معاها بكالوريوس أقل من مرتب الخادمه
المحقق: لالا مرتب الخادمه ستمية ولا ثمانمية ريال
الجني مقاطعا: إنت محقق ولا حمار ؟ الخادمه ما تصرف ريال واحد أكل وشرب وتذكره ولبس ونقل وعلاج ، المعلمه تسلم راتبها بالمواصلات إنت ما تفهم ؟
المحقق : طيب فكنا من سالفة التعيين شف لي تكفى على قرض البنك العقاري الظاهر إنه يجلس خمستعش سنه علشان يجيني
الجني : يا إبن الناس إنت جالس تعجزني ولا أحد مسلطك علي ، والله ذي مالها حل لا عندي ولا عند غيري
المحقق: أجل أعتدل وخلنا نكمل التحقيق
الجني : تفضل والله إنك صعبان علي لكن الشكوى لله
المحقق: كم شهر وإنت متلبس في القاضي
الجني: هلحين رجعنا لطير ياللي، يبوي شف أكتب اللي تبي ونا بوقع عليه ، على الحالتين ماتقدرون تسوون فيني شي وهذا التوقيف حقكم أقرب ممسحه ولا مكنسه حطيت رجلي وبصراحه بهاجر وبروح خارج المملكه ، ياخي عليكم شغلات والله ماحد فكر فيها أجل قد شفت تحقيق مع جني وأخذ إفادته وتروح للمحكمه؟ معليش إلا إسم الكريم إنت ماقلتي لي إسمك؟
المحقق: قوللي أبو خالد
الجني : شف أبو خالد رح لتاريخ القضاء الإسلامي ورح لتاريخ القانون الفرنسي والهندي والأمريكي والتنزاني وقانون زمبابوي، قد سمعت بسالفة طلب المعلومات من جني ؟ قد سمعت بالدفع بسبب السحر ، طيب ولو إفترضنا إن الرجال مسحور يعني ما يجي السحر إلا في البزنس والمصالح ، يعني ذا شي والله ما ينبلع ومن الآخر عيب يارجل.
المحقق: طيب إنت إيش الحل بإعتقادك
الجني : بقولك وأبشر، شف يابو خالد إيش يصير في القضية هذي مسألة خاصة بالمحكمه والتحقيق اللي بتسويه لا حد يسمع عنه والله بيضحكون الناس عليكم، والله يستر من اخوك أبو سعد راعي المدونة ما يجيه القاضي وينتفه سنتين قذف والرجال ما ناقصه، وإنت ياخي تعال برتب لك ترتيب تعيش إنت وعيالك
المحقق: كيف يعني؟
الجني : من الآخر بضبط لك صك بخمسية ألف متر محل ما تبي ، الرياض ، المدينه ـ مكه - جده - القصيم ، محل ماتبي ومن يطلع الصك وأطبق لك الأرض والمساحه وأبشر بالموقع ، بيعها ويسر أمرك
المحقق: يارجل إنت تبي تورطني
الجني : اورطك؟ يعيباه أبو خالد شف لك محامي لو أتهموك وقول إنك مسحور وحط إسمي ونا بشهد لك وبطلبك طلب واحد ، قول للمحققين والمحكمه يفكونا من سالفة السحر هذي والجني ، هذي لو جلسنا حنا الجن خمسين ألف سنه ما تطلع مننا ، كيف طلعتوها وتقولون علينا جن ؟
ليست هناك تعليقات:
إرسال تعليق